Mae’r rhieni sy’n mynychu’r Grŵp Dysgu amlddiwylliannol yn Ysgol Uwchradd Cathays yng Nghaerdydd yn cael cyfartaledd o 120 o gymwysterau yn flynyddol sydd wedi helpu bron eu hanner i ddod o hyd i waith. Datblygodd y grŵp, a ffurfiwyd yn 2014, bartneriaeth lwyddiannus gyda Addysg Oedolion Cymru i ddangos manteision addysg oedolion, i fenywod a’u teuluoedd yn neilltuol.

Trwy ymdrin ag anghenion y gymuned, mae’r bartneriaeth yn grymuso rhieni trwy gynnig cyrsiau wedi eu hachredu a heb eu hachredu, gan gynnwys llythrennedd, rhifedd, digidol, gofal plant, sgiliau creadigol a choginio. Mae’r sgiliau a’r hyder y maent yn eu datblygu yn eu helpu i gefnogi addysg eu plant a thyfu’n bersonol a phroffesiynol.

Aeth bron i 50 o fenywod yn ôl i waith mewn sectorau amrywiol. Mae eu hannibyniaeth economaidd yn cynyddu incwm y teulu ac yn gwella ansawdd eu bywydau yn gyffredinol yn sylweddol. Helpodd y bartneriaeth ddysgu I gynyddu sgiliau a meithrin hyder, ymhlith menywod o gefndiroedd diwylliannol amrywiol yn neilltuol. Siaredir mwy na 65 o ieithoedd gwahanol gan rieni sy’n mynychu’r grŵp a daw 43% o’r disgyblion yn yr ysgol o deuluoedd sy’n gymwys am brydau ysgol am ddim.

“Mae effeithiau pellgyrhaeddol y cynllun dysgu oedolion hwn yn rhai diriaethol a thrawsnewidiol,” dywedodd Jayne Ireland, rheolwr rhanbarthol Addysg Oedolion Cymru, a enwebodd y grŵp am y wobr. “Trwy rymuso’r menywod hyn i oresgyn rhwystrau ac ailymuno â’r gweithlu, nid yn unig mae’r Grŵp Dysgu Rhieni o fudd i deuluoedd unigol ond hefyd mae’n cyfrannu sgiliau a thalentau gwerthfawr at yr economi leol.”

Dywedodd y tiwtor Christina Roy, sydd hefyd yn gydlynydd dysgu teuluol Ysgol Uwchradd Cathays: “Mae helpu rhieni i gefnogi eu plant i ddysgu’n well a datblygu eu hunain i fod yn hyderus, medrus a hunan-ddibynnol yn rhoi boddhad mawr.” Mae’r grŵp hefyd yn codi ymwybyddiaeth am atal diabetes a chyflyrau ar y galon mewn cymunedau sydd â risg uwch, ac mae wedi mwy na dyblu’r nifer sy’n cymryd brechiadau i 42%.

Dysgodd y rhieni sy’n dysgu sgiliau newydd trwy wirfoddoli, gan gynnwys prosiectau Cymunedol Caerdydd Lân ac mewn clwb brecwast. Dywedodd un
rhiant: “Rwyf wedi dilyn y cwrs i wella fy sgiliau ymarferol a chyfathrebu. Maen nhw wedi fy helpu i weithio gyda’m plant sydd yn un o’m nodau.”

Ychwanegodd Christina: “Heblaw ennill cymwysterau i ddatblygu eu hunain, mae’r holl ddysgwyr yn teimlo eu bod wedi helpu ei gilydd i greu gwell cymuned i bawb. Trwy rannu ein gwybodaeth, profiad a phositifrwydd, byddant yn tyfu.”