YMUNWCH Â’N PARTNERIAETH YMGYRCH
Cynhelir yr Wythnos Addysg Oedolion rhwng 15 a 21 Medi, gyda gweithgareddau hyrwyddo drwy gydol y mis.
Mae’r Wythnos Addysg Oedolion yn ymgyrch flynyddol a gaiff ei chydlynu gyda Llywodraeth Cymru. Ei nod yw helpu pobl i ddarganfod amrywiaeth eang o gyfleoedd dysgu, gan arddangos manteision niferus addysg oedolion a chydnabod llwyddiannau unigolion, prosiectau a sefydliadau yng Nghymru sy’n ymroddedig i ddysgu gydol oes a datblygu sgiliau.
Rhwng 15 a 21 Medi, a thrwy fis Medi ar ei hyd, bydd yr Wythnos Addysg Oedolion yn rhoi llwyfan i bobl ddarganfod effaith drawsnewidiol addysg oedolion. Byddwn yn rhoi sylw i wahanol lwybrau dysgu – o addysg bellach a dysgu yn y gymuned i gyfleoedd cyflogaeth a digwyddiadau arbennig. Ein gweledigaeth yw ysbrydoli cynifer o bobl ag sydd modd i ymchwilio cyfleoedd newydd, eu grymuso i gynyddu eu sgiliau, rhoi hwb i’w hyder a’u iechyd a lles cyffredinol, sicrhau cynnydd yn eu gyrfaoedd a datblygu angerdd dros ddysgu gydol oes.
Caiff yr ymgyrch flynyddol ei dathlu drwy bartneriaeth gref o ddarparwyr Wythnos Addysg Oedolion o wahanol sectorau. Maent yn cynnig amrywiaeth o brofiadau ar-lein ac wyneb yn wyneb, yn cynnwys sesiynau blasu, cyrsiau byr, dyddiau agored, sesiynau gwybodaeth a chyngor a digwyddiadau arbennig sy’n dathlu’r gorau mewn addysg oedolion yng Nghymru.
Cronfa Arloesedd:
Mae’r Gronfa Arloesedd ar gael ar gyfer darparwyr addysg oedolion yng Nghymru sy’n dymuno cyflwyno sesiynau yn y gymuned, ar-lein neu weithgaredd hyrwyddo yn ystod wythnos yr ymgyrch a thrwy gydol mis Medi 2025. Nod y gronfa yw cefnogi creu gweithgareddau dysgu arloesol ac am ddim sy’n ysbrydoli dysgwyr newydd a dysgwyr presennol, yn cynnwys sesiynau blasu wyneb yn wyneb neu ar-lein, gweithgareddau maes, dyddiau agored, dosbarthiadau meistr a chynlluniau llais dysgwyr neu ddysgu fel teulu. Ewch i’n tudalen Cronfa Arloesedd i gael mwy o wybodaeth am y broses a dolenni i’r dogfennau cais. Y dyddiad cau ar gyfer cynigion yw 15 Gorffennaf 2025.
Ymchwilio themâu ymgyrch eleni:
Ymuno â’n rhwydwaith o bartneriaid:
Gyda’n gilydd gallwn dynnu sylw a chynyddu momentwm dysgu gydol oes yng Nghymru ac ysbrydoli mwy o oedolion i symud ymlaen ac adeiladu dyfodol gwell. Drwy gydweithio, credwn y gallwn gyrraedd hyd yn oed ymhellach a chael mwy fyth o effaith. Rydym bob amser yn edrych am gyfleoedd i ehangu ein rhwydwaith ac yn croesawu partneriaid newydd.
Sut i gymryd rhan:
Trefnu a chyflwyno sesiynau blasu ar-lein neu wyneb yn wyneb, cyrsiau a digwyddiadau arbennig. Lanlwythwch nhw ar ein gwefan a chânt eu hyrwyddo fel rhan o’r ymgyrch yn y cyfryngau. Edrychwch ar y cynnwys presennol a gafodd ei lanlwytho i’r calendr, sy’n cynnwys 13 categori pwnc.
Dathlu llwyddiannau eithriadol pobl a gafodd fynediad i’ch darpariaeth; rhoi sylw i fanteision dysgu a sut mae wedi trawsnewid bywydau. Bydd rhannu straeon llwyddiant yn ysbrydoli pobl eraill i ddarganfod yr effaith newid bywyd a gaiff addysg oedolion.
Mae’r Wythnos Addysg Oedolion yn gyfle gwych i roi sylw i’ch gwybodaeth, cyngor ac arweiniad. Hyrwyddwch eich darpariaeth ddysgu newydd a phresennol ar gyfer oedolion a’r llwybrau sydd ar gael iddynt i ailhyfforddi, cynyddu sgiliau, meithrin cysylltiadau cymdeithasol a chefnogi iechyd a llesiant. Rhannwch wybodaeth am yr ymgyrch gyda’ch dysgwyr, hybiau, grwpiau cymunedol a rhwydweithiau staff.
Rhoi sylw i’ch gwaith: Cysylltwch eich cyfathrebu gyda’r Wythnos Addysg Oedolion drwy rannu eich ymchwil, ysgrifennu erthygl neu lansio papur polisi yn dangos gwerth dysgu gydol oes. Efallai y byddech am ganolbwyntio ar y rhwystrau presennol, rhaglenni llwyddiannus neu’r blociau adeiladu sydd eu hangen i wneud Cymru yn genedl ail gyfle.
Mae argymhellion personol drwy’r gymuned leol yn arf a catalydd grymus ar gyfer llawer o bobl sy’n edrych am gyfeiriad a llwybr newydd mewn bywyd. Gweithiwch gyda’ch llysgenhadon dysgwyr i ysbrydoli pobl eraill i gymryd y cam cyntaf. Anogwch eich llysgenhadon dysgwyr i drefnu gweithgareddau dysgu, cyfeirio at wybodaeth neu siarad mewn digwyddiad.
Paratowch ar gyfer yr Wythnos Addysg Oedolion! Mae ein pecyn ymgyrch yn adnodd hanfodol yn llawn gwybodaeth allweddol, asedau brandio a thempledi parod eu defnyddio i gefnogi eich gweithgareddau.
Gallwn eich cefnogi gyda’r canlynol
- Cyfrif darparydd dysgu am ddim: Byddwn yn trefnu eich cyfrif darparydd am ddim ar wefan yr Wythnos Addysg Oedolion a bydd gennych fynediad iddo drwy gydol y flwyddyn.
- Hyrwyddo eich darpariaeth a gweithgareddau. Unwaith y cafodd eich proffil darparydd ei agor, byddwch yn medru llenwi eich manylion darparydd a lanlwytho eich gweithgareddau dysgu am ddim drwy ein calendr digwyddiadau ar-lein. Caiff yr holl weithgareddau a gaiff eu lanlwytho ar gyfer yr Wythnos Addysg Oedolion eu hyrwyddo drwy ymgyrch amlgyfryngau a gaiff ei hariannu, yn cynnwys sianeli Cymru’n Gweithio a’r Sefydliad Dysgu a Gwaith.
- Adnoddau: Mynediad llawn i becyn ymgyrch yr Wythnos Addysg Oedolion.
- Gweithgaredd traws-hyrwyddo: Gweithiwch gyda ni i gynyddu sylw i’r eithaf ar gyfer eich gweithgaredd yn yr Wythnos Addysg Oedolion. Os oes gennych unrhyw syniadau neu os dymunwch drafod eich cynlluniau, siaradwch gydag aelod o’n tîm drwy anfon e-bost at: alwevents@learningandwork.org.uk.
Sut i gofrestru eich gweithgaredd ymgyrch:
Os ydych wedi cyflwyno rhaglen ar gyfer yr Wythnos Addysg Oedolion yn flaenorol a bod gennych gyfrif gyda ni eisoes, mewngofnodwch i gofrestru eich digwyddiadau os gwelwch yn dda. Edrychwch ar ein tudalen darparwyr i weld os yw eich sefydliad eisoes wedi cofrestru fel darparydd.
Os ydych yn newydd i’r Wythnos Addysg Oedolion, lanlwythwch a llenwi ein ffurflen ymgyrch a’i dychwelyd i’r Sefydliad Dysgu a Gwaith drwy e-bost: alwevents@learningandwork.org.uk.
Os hoffech fwy o wybodaeth am yr ymgyrch neu os ydych angen cymorth gyda’ch cyfrif, cysylltwch â ni.